Мадӕн

Мади фагӕ фӕлмӕн дзуртӕ
Иссерӕн дӕр ку нӕййес…
Ци тӕнӕг фӕууй ӕ зӕрдӕ,
Ци гъар фӕууй ӕ гъӕбес…
Фӕ`ннӕ тавуй фӕлмӕн хорау,
Фӕ`ннӕ аразуй надбӕл,
Фӕккӕнуй ӕдзох тӕрхӕнттӕ
Мах идарддӕри цардбӕл.
Ӕ комидзаг ӕнӕвгъауӕй
Мах гъӕлӕси фӕццӕвуй,
Ӕхсӕвӕ ба мах сагъӕсӕй
Ӕнӕ хуссаг е фӕууй.
Бӕргӕ фӕууй е алкӕддӕр
Федар цӕгиндзӕ махӕн,
Уотӕ фенгъӕлӕн ӕносмӕ
Мӕлӕт дӕр нӕййес мадӕн.
Фал… Ку рахъан уй, ку, нӕ мадӕ,
Ӕ къах бакъуӕргӕй еу бон,
Ку`рӕнцайуй ӕ фӕлладӕй,
Ци зин фӕууй, ци, мӕ бон…
Тӕходуйтӕ ма ку уайдӕ
Мади хъиамӕттӕн федӕн,
Бӕргӕ уайдӕ уӕд ӕнцондӕр
Адӕймагӕн ӕхецӕн…
Ку лӕдӕридӕ бӕдолӕ
Куд хъиамӕтгун ӕй мадӕ,
Ӕхецӕн ейӕ ӕносмӕ
Искӕнидӕ уӕд кадӕ.
Ма`вгъау кӕнтӕ уӕ маддӕлтӕн
Ӕгириддӕр фӕлмӕн дзурд,
Архаетӕ, ци`й фӕндӕуа,
Уой кӕнунбӕл хъӕбӕр цурд.
Некӕд уодзӕй еци гъуддаг
Сумахӕн уӕд фӕсмойнаг,
Ку исуадза уарзон мадӕ
Сау сикъити ӕ фӕллад…

 

Таухъазахти-Хъаирти Рая